Зурвас бичих
Messenger
Залгах
Халаагуур хэрэглэдэг айл сард хэдэн төгрөгийн төлбөр төлөх вэ?
Нийслэлийн агаарын чанарыг сайжруулах бүсийн гэр хорооллын айл өрхүүдэд цахилгааны үнийн урамшуулал олгох ажил Агаарын тухай хууль болон Засгийн газрын тогтоолоор батлагдсан журмын дагуу явагдаж байна.
Өнөөдрийн байдлаар нийт 68895 айл өрх УБЦТС компанитай цахилгааны үнийн урамшуулал олгох гэрээ байгуулж, хөнгөлөлтөд хамрагдаж байгаагаас 95 хувь нь сайжруулсан зуух ашиглаж 200 кВт.ц, цахилгаан халаагууртай 3682 өрх буюу шөнийн цагаар хэрэглэсэн 3000 кВт.ц хүртэлх хэрэглээний цахилгааны төлбөрийн 50 хувийг сар бүр хөнгөлүүлж байна.
Хэрвээ та халаалтаа цахилгаанаар шийдэхийг хүсч байгаа бол халаагуураа худалдан авахаасаа өмнө сарын цахилгаан хэрэглээнийхээ төлбөрийг хэд орчим гарахыг тооцож үзэх нь зүйтэй. Зах зээлд цахилгаан халаалтын төхөөрөмж худалдаж байгаа компаниуд бараагаа борлуулахдаа цахилгаан бага зарцуулдаг, төлбөрт нь санаа зовох хэрэггүй гэж сурталчлах нь олон. Гэвч ашиглаж эхэлсэн эхний сараас л тооцоолж байснаас нь давсан төлбөр гарлаа гэх хэрэглэгч цөөнгүй байгаа тул та худалдаж авахаасаа өмнө тооцоо гаргаж үзэхэд илүүдэхгүй. Та доорх аргаар хялбархан тооцоолол хийж үзээрэй.
Цахилгаан эрчим хүчний төлбөрөө урьдчилан тооцохын тулд хэрэглэж байгаа цахилгаан хэрэгслийнхээ суурилагдсан чадлыг мэдэх нь чухал. Чадлыг цахилгаан хэрэгсэл дээр англи W үсгээр тэмдэглэсэн байдаг.
Тухайн халаагуурын суурилагдсан чадлыг үндэслэж 1 сард гарах цахилгааны төлбөрийг тооцож болно.
- ЦТ /₮/ = (W * t 1* 30 * Ү1 )+ (W * t 2* 30 * Ү2 )
- ЦТ- хэрэглэгчийн цахилгааны төлбөр
- W /кВт/ - халаагуурын суурилагдсан чадал
- t1 /цаг/ – орой, шөнийн хэрэглээний цагаар залгаатай байх хугацаа
- t2 /цаг/ – өдрийн хэрэглээний цагаар залгаатай байх хугацаа
- 30 /хоног/ - сард залгасан хоногийн тоо
- Ү1 /төг/ – шөнийн хэрэглээний үнэ тариф
- Ү2 /төг/ – өдрийн хэрэглээний үнэ тариф
Та Эрчим хүчний зохицуулах хорооны 2014 оны арваннэгдүгээр сарын 19-ний өдрийн 192 дугаар тогтоолоор батлагдан өнөөдөр мөрдөгдөж байгаа айл өрхөд борлуулах цахилгааны тарифыг тооцоондоо ашиглаарай.
УИХ-ын 2011 оны 11 дүгээр тогтоолын 1.1-д: “Нийслэлийн агаарын чанарыг сайжруулах бүсийн гэр хорооллын цахилгаан эрчим хүчний шөнийн хэрэглээний цагийг хүйтний улиралд оройн 18 цагаас өглөөний 09 цаг хүртэл сунгаж, Нийслэлийн агаарын бохирдлыг бууруулах тухай хуульд заасан нөхцөл, шалгуур хангасан айл өрхөд цахилгаан эрчим хүчний үнийг 50 хувиар бууруулна” гэж заасан байдаг.
Эцэст нь зөвлөхөд таны цахилгааны төлбөрийн хэмжээ халаагуураа хэдэн цаг ажиллуулахаас шууд хамаарах тул та хугацааны релетэй халаах төхөөрөмж авах, ажиллах цагийг нь аль болох багасгаж тохируулах, гэр, байраа сайтар дулаалж дулаанаа алдахгүй байхад анхаарал тавиарай.
Сурталчилгаа